ហេតុអ្វីបានជាការលេងមានសារសំខាន់?

on Thursday, 15 February 2018. Posted in Parenting Tips, Activities

importance of play

ការ​លេង​អាច​លើស​ពី​អ្វី​ដែល​គ្រាន់​តែ​ជា​ការ​សប្បាយ​សម្រាប់​ទារក និង​កុមារ។ វា​ជា​វិធី​ដែល​ពួក​គេ​អាច​រៀន​បាន​យ៉ាង​រហ័ស វិធី​ដែល​ពួក​គេ​អាច​ដឹង​ថា​ពួក​គេ​ជា​នរណា និង​ទី​កន្លែង​ដែល​គេ​កំពុង​រស់​នៅ​ប្រចាំ​ថ្ងៃ​នេះ​ថា​ជា​កន្លែង​អ្វី។

សារ​សំខាន់​នៃ​ការ​លេង

ការ​លេង គឺ​ជា​ផ្នែក​ដ៏​សំខាន់​មួយ​ដែល​អ្នក​អាច​ធ្វើ​ជាមួយ​កូន​របស់​អ្នក​បាន ព្រោះ​ការ​លេង​មាន​សារ​សំខាន់​ដល់​ការ​អភិវឌ្ឍ​ខួរ​ក្បាល​របស់​កុមារ។ ពេល​ដែល​អ្នក​ចំណាយ​ពេល​លេង​ជាមួយ​ពួក​គេ​អាច​ផ្ដល់​នូវ​វិធី​ដ៏​ច្រើន និង​ពេល​វេលា​ក្នុង​ការ​រៀន។

ការ​លេង​ក៏​អាច​ជួយ​កូន​របស់​អ្នក​ឱ្យ៖

  • បណ្ដុះភាពជឿជាក់លើខ្លួនឯង
  • ទទួលអារម្មណ៍ស្រឡាញ់ សប្បាយចិត្ត និងសុវត្ថិភាព
  • អភិវឌ្ឍជំនាញសង្គម ភាសា និងទំនាក់ទំនង
  • រៀនពីការខ្វល់ពីអ្នកដទៃ និងបរិយាកាសជុំវិញខ្លួន
  • អភិវឌ្ឍជំនាញកាយសម្បទា

ប្រភេទផ្សេងៗនៃការលេង

ការ​លេង​ដោយ​សេរី មិន​មាន​លក្ខណៈ​ជា​សម្ព័ន្ធ គឺ​ជា​ប្រភេទ​នៃ​ការ​លេង​សម្រាប់​កុមារ​តូចៗ។ ការ​លេង​នេះ​អាច​កើត​មាន​ឡើង​នៅ​ពេល​ដែល​កូន​របស់​អ្នក​ចង់​លេង។ ការ​លេង​ដោយ​សេរី ជា​ការ​លេង​ដោយ​មិន​បាន​គ្រោង​ទុក​ជា​មុន ហើយ​ការ​លេង​នេះ​អាច​ឱ្យ​កូន​របស់​អ្នក​ប្រើ​ក្ដី​ស្រមៃ​របស់​ពួក​គេ និង​ចាប់​ផ្ដើម​លេង​តាម​របៀប​ដែល​គេ​ចង់។

ឧទាហរណ៍នានាដែលសន្មតថាជាការលេងដោយសេរី៖

  • ការ​លេង​តែ​ម្នាក់​ឯង ឬ​ជាមួយ​អ្នក​ដទៃ​ដែល​មាន​លក្ខណៈ​ច្នៃ​ប្រឌិដ្ឋ រួម​មាន​សកម្មភាព​សិល្បៈ ឬ​តន្រ្តី​ជា​ដើម
  • ការ​លេង​បែប​ស្រមើ​ស្រមៃ ឧទាហរណ៍ ការ​បង្កើត​ផ្ទះ​ដោយ​ប្រើ​ប្រអប់ ឬ​ភួយ ការ​ស្លៀក​ពាក់​ប្លែកៗ ឬ​ការ​លេង​សៀក​ឆ្ពិន​ភ្នែក​ជា​ដើម
  • ការ​រុក​រក​កន្លែង​លេង​ថ្មី ឬ​កន្លែង​ដែល​ចូល​ចិត្ត​ដូច​ជា ទីធ្លា​លេង​ក្រោយ​ផ្ទះ សួន​ច្បារ និង​ទោង​ជា​ដើម ។ល។

អ្នក​អាច​ជា​ផ្នែក​មួយ​នៃ​ការ​លេង​របស់​កូនៗ។ ពេល​ខ្លះ អ្វី​ដែល​អ្នក​ត្រូវ​ធ្វើ​នោះ គឺបង្ហាញ​កូនៗ​ពី​ផ្លូវ/វិធី​ត្រូវ ដូច​ជា​បង្ហាញ​កន្លែង​ទុក​សម្ភារ​ដែល​កូនៗ​ចង់​បាន​សម្រាប់​ការ​លេង​របស់​ពួក​គេ។ ហើយ​ពេល​ខ្លះ​ទៀត អ្នក​ប្រហែល​ជា​ត្រូវ​មាន​ភាព​រស់​រវើក​បន្តិច។

ការ​លេង​ដែល​មាន​ក្បួន​ត្រឹម​ត្រូវ គឺ​ជា​ការ​លេង​ដែល​មានលក្ខណៈ​ប្លែក។ វា​ត្រូវ​ការ​ឱ្យ​មាន​ការ​រៀប​ចំ​ទុក​មុន ទាំង​ពេល​វេលា និង​ទី​កន្លែង ហើយ​ភាគ​ច្រើន​ត្រូវ​បាន​រៀប​ចំ​ដោយ​មនុស្ស​ធំ។

ឧទាហរណ៍ខ្លះនៃការលេងលក្ខណៈនេះ។

  • ថ្នាក់​រៀន​ហែល​ទឹក​សម្រាប់​កុមារ​តូចៗ និង​សម្រាប់​កុមារ​ធំ៖ អ្នក​ប្រហែល​ជា​គិត​ថា​ការ​​ហែល​ទឹក​មាន​សារ​សំខាន់​សម្រាប់​ពួក​គេ ប៉ុន្តែ ពួកគេ​ប្រហែល​ជា​គិត​ថា​វាសប្បាយ​តែ​ប៉ុណ្ណោះ​
  • ក្រុម​និទាន​រឿង​សម្រាប់​កុមារ​តូចៗ​នៅ​ក្នុង​បណ្ណាល័យ​ក្នុង​តំបន់
  • ថ្នាក់​រៀន​រាំ តន្រ្ដី ឬ​ល្ខោន​សម្រាប់​កុមារ​គ្រប់​វ័យ
  • ហ្គេម​ដែល​ប្រើ​ប្រាជ្ញា
  • ហាត់​កីឡា ដូច​ជា​កីឡា​បាល់​ទាត់ បាល់​បោះ។ល។

វិធីដែលការលេងអាចអភិវឌ្ឍកូនៗ

ពេល​ដែល​កូន​អ្នក​ចាប់​ផ្ដើម​លូត​លាស់ វិធី​ដែល​គេ​លេង​នឹង​ត្រូវ​ផ្លាស់​ប្ដូរ គេ​នឹង​កាន់​តែ​មាន​ភាព​ច្នៃ​ប្រឌិដ្ឋ​ជាង​មុន និង​មាន​បទពិសោធន៍​ជាមួយ​នឹង​ប្រដាប់​លេង ហ្គេម និង​គំនិត​ច្រើន​ជាង​មុន។ នេះ​ប្រហែល​មាន​ន័យ​ថា​នាង​ត្រូវ​ការ​ពេល​វេលា និង​កន្លែង​បន្ថែម​សម្រាប់​លេង។

ជាមួយ​គ្នា​នេះ​ដែរ កុមារ​មាន​ការ​ធ្វើ​បំលាស់​ទី​បាន​ច្រើន​លក្ខណៈ​ផ្សេង​គ្នា​ពេល​ដែល​គេ​ធំ​ឡើង។ នេះ​រួម​បញ្ចូល​ទាំង​ការ​លេង​តែ​ម្នាក់​ឯង ការ​លេង​ជាមួយក្មេង​ដទៃ និង​ការ​ចូល​រួម​លេង​ជាមួយ​ក្មេង​ដទៃ។

ទារក
សម្រាប់​ទារក ​អ្វី​ដែល​ល្អ​សម្រាប់​លេង​ជាមួយ​បំផុត​នោះ គឺ​អ្នក។ គ្រាន់តែ​សម្លឹង​មើល​មុខ​របស់​អ្នក និង​ឮ​សំឡេង​របស់​អ្នក គឺ​ជា​ការ​លេង​សម្រាប់​ទារក​តូច​របស់​អ្នក ជា​ពិសេស ប្រសិន​បើ​អ្នក​កំពុង​ញញឹម​រក​ពួក​គេ​។

អ្នកប្រហែលជាចង់សាកល្បងនូវគំនិត និងសកម្មភាពលេង

  • តន្រ្តី ចម្រៀង ការ​តប់​លើ​ពោះ​កូន​ស្រាលៗ​ពេល​ដែល​អ្នក​ច្រៀង ប្រអប់​ដែល​ដាក់​របស់​ផ្សេងៗ​ ដែល​ជា​ចំណែក​ក្នុង​ការ​ជួយ​ឱ្យ​ពួក​គេ​មាន​ការ​អភិវឌ្ឍ​ការ​ស្ដាប់ និង​ការ​ធ្វើ​ចលនា។
  • វត្ថុ​ដែល​មាន​ទំហំ រូបរាង និង​ពណ៌​ផ្សេងៗ​ដែល​ជួយ​ជំរុញ​ដល់​ការ​ចាប់​យក​ពី​ក្មេង។
  • គ្រឿង​សង្ហារឹម បាល់ ប្រដាប់​លេង ឬ​ប្រអប់​ដែល​អាច​ឱ្យ​កុមារ​តូច​វារ​លើ ឈរ និង​ដើរ។

ការ​ធ្វើ​លំហាត់​ប្រាណ​រាងកាយ​ទៀង​ទាត់ និង​ការ​លេង​លើកម្រាល​ឥដ្ឋ​រាប​ស្មើ​ពិត​ជាមាន​សារ​សំខាន់​សម្រាប់​ការ​អភិវឌ្ឍ និង​លូត​លាស់​របស់​ទារក។ ការ​ធ្វើ​លំហាត់​ប្រាណ​រាង​កាយ​នេះ​ជួយ​ឱ្យ​កូន​តូច​របស់​អ្នក​អភិវឌ្ឍ​ការ​គ្រប់គ្រង​ចលនា​ដោយ​ការ​ពង្រឹង​ផ្នែក​ក្បាល​ ក និង​សាច់​ដុំលើ​រាង​កាយ។ វា​ក៏​អាច​ឱ្យ​កូន​របស់​អ្នក​មើល​ឃើញ និង​ស្វែង​យល់​ពី​ពិភព​ជុំវិញ​ខ្លួន​ពួក​គេ​តាម​លក្ខណៈ​ផ្សេងៗ។

កុមារចេះដើរ
ខាង​ក្រោម​នេះ គឺ​ជា​គំនិត​ខ្លះៗ​ដែល​កូន​របស់​អ្នក​អាច​ចូលរួ​មដោយ​រីករាយ៖

  • របស់​ដែល​ធំ ហើយ​ស្រាល​ដូច​ជា ប្រអប់​ក្រដាស កន្រ្តក ឬ​បាល់​ផ្លុំ​ដែល​អាច​ជំរុញ​ឱ្យ​កូន​របស់​អ្នក​រត់ ចាប់ រុញ និង​ទម្លាក់​របស់​នានា។
  • ដីស ខ្សែ​ពួរ តន្រ្តី ឬ​ប្រអប់​ដាក់​របស់​ដែល​អាច​ឱ្យ​កូន​អ្នក​អាច​លោត ទាត់ ច្រំ ជាន់ និង​រត់​បាន​។
  • កង​បង្វិល ប្រអប់ ដុំ​ថ្ម​ធំ ឬ​ខ្នើយ​ដែល​ស័ក្តិសម​សម្រាប់​ការ​តោង​ឡើង ការ​ទប់​លំនឹង ការ​បង្វិល​ខ្លួន ការ​លោត​បែប​ញាប់​ញ័រ ឬ​ការ​រមៀល​ខ្លួន​ជា​ដើម។
  • ទួល ផ្លូវ​រូង​ក្រោម​ដី ឬ​ធ្នើ​បន្ទប់​ដែល​អាច​ឱ្យ​កូន​មាន​ការ​ធ្វើ​សកម្មភាព​រាង​កាយ​ខ្លះ​ដូច​ជា​វារ​ និង​ស្វែង​រក។

ប្រសិន​បើ​អ្នក​ចាក់​តន្រ្តី​ដែលពួក​គេ​ចូល​ចិត្ត​ពេល​អ្នក​កំពុង​លេង​ជាមួយ​ពួក​គេ គេ​អាច​នឹង​ទទួល​បាន​នូវ​ការ​ស្ដាប់​ចម្រៀង​កម្សាន្ត​ផង និង​លេង​ផង។ អ្នក​ប្រហែល​ជា​អាច​ច្រៀង រាំ និង​ទះដៃ​ទៅ​តាម​ចង្វាក់​ភ្លេង​ជាមួយ​កូនៗ​ផង​ដែរ។

កុមារដែលកំពុងសិក្សាថ្នាក់មត្តេយ្យកម្រិតទាប
ខាងក្រោមនេះគឺជាគំនិតខ្លះៗដើម្បីឱ្យកូនៗលេង៖

  • ប្រអប់​​ទឹកដោះគោ​ចាស់ៗ ស្លាបព្រា​ឈើ ផើង​ផ្កា​ទទេ ឈើ ក្រដាស​ញី ធុង​ជ័រ ឆ្នាំង​សំឡ​ និង​សម្លៀក​បំពាក់​ចាស់ៗ​ដែល​មាន​ប្រយោជន៍​សម្រាប់​ការ​លេង​ដែល​មិន​មាន​លក្ខណៈ​ស្មុគ​ស្មាញ
  • រូបផ្គុំ និង​ហ្គេម​ផ្គុំ​ផ្សេងៗ​ដែល​ជួយ​បង្កើន​ការ​ចង​ចាំ និង​ការ​ផ្ចង់​ស្មារតី​របស់​កុមារ​
  • ដីឥដ្ឋដែលជួយអភិវឌ្ឍជំនាញប្រើចលនាសាច់ដុំ
  • តន្រ្តី​ដែល​ពួក​គេ​ចូល​ចិត្ត ឬ​ឆ្នាំង និង​ខ្ទះ​សម្រាប់​បង្កើត​ជា​តន្រ្តី​ឱ្យ​គេ​រាំ​លេង
  • បាល់ និងថាសគប់អាចជំរុញឱ្យពួកគេអាចទាត់ គប់ និងរមៀលខ្លួន

ពេល​ដែល​អ្នក​លើក​ទឹក​ចិត្ត​កូន​របស់​អ្នក​ឱ្យ​ទាត់ ឬគប់ អ្នក​ត្រូវ​ព្យាយាម​ណែនាំ​ឱ្យពួក​គេ​រៀន​ប្រើ​ចលនា​នៃ​រាង​កាយ​របស់​ពួក​គេ​ពី​ម្ខាង​ទៅ​ម្ខាង​ទៀត។

កុមារដែលចាប់ផ្ដើមចូលរៀនបឋមសិក្សា
កូន​ដែល​កំពុង​រៀន​នៅ​ថ្នាក់​បឋម​សិក្សា​អាច​មាន​ភាព​សប្បាយ​រីករាយ​ដោយ​គ្រាន់​តែ​មាន​វត្ថុ និង​សកម្មភាព​លេង​ដូច​ខាង​ក្រោម៖

  • គ្រឿង​សង្ហារឹម ក្រណាត់ កន្រ្តក​ដាក់​សម្លៀកបំពាក់​ដែល​ស្លៀក​រួច តង់ និង​ប្រអប់​ដែល​អាច​ប្រើ​សម្រាប់​ការ​សាង​សង់បាន។
  • វិធីសាស្ត្រ​ពិបាកៗ​ដែល​អ្នក​រៀប​ចំ​ដើម្បី​ឱ្យ​កូន​រៀន​ធ្វើ​បំលាស់​ទី​តាម​របៀប ផ្លូវ ទិស និង​ល្បឿន​ផ្សេង​គ្នា។
  • ចម្រៀង​លាយ​នឹង​ការ​លេង​ហ្គេម
  • ការ​ចម្អិន​អាហារ​ងាយៗ ឬ​ក៏​ការ​រៀប​ចំ​អាហារ​ដូច​ជា​ការ​ថ្លឹង ការ​កូរ ឬ​ការ​រៀប​ចំ​ដួស​ម្ហូប​ដាក់​ចាន​សុទ្ធ​តែ​មាន​ប្រយោជន៍​សម្រាប់​ការ​អភិវឌ្ឍ​ជំនាញ​គណិតវិទ្យា ឬ​ជំនាញ​ប្រចាំថ្ងៃ។
  • ការ​ស្រមើ​ស្រមៃ​របស់​កូនៗ៖ ដោយ​ការ​ប្រើ​ការ​ស្រមើ​ស្រមៃ ពួក​គេ​នឹង​ផ្លាស់ប្ដូរ​ខ្លួន​ឯង​ឱ្យ​ទៅ​ជា​តួ​អង្គ​វីរបុរស ឬ​តួអង្គ​ណាមួយ​នៅ​ក្នុង​រឿង​និទាន។

ប្រសិន​បើ​កូន​របស់​អ្នក​មាន​ចំណាប់​អារម្មណ៍ អ្នក​អាច​ឱ្យ​ពួកគេ​សាក​ល្បង​ចូលរួម​លេង​កីឡា ឬ​សកម្មភាព​ជា​ក្រុម​ផ្សេងៗ​ដែល​ស័ក្ដិសម​សម្រាប់​វ័យ​របស់​ពួក​គេ។

ប្រសិនបើកូនអ្នកមិនចង់លេង

មាន​ពេល​ខ្លះ​ដែល​កូន​របស់​អ្នក​មិន​ចង់​លេង ឧទាហរណ៍ ពេល​ដែល​គេ​ហត់ ឬ​ធុញ​នឹង​ការ​ធ្វើ​សកម្មភាព​ដដែលៗ​ក្នុង​រយៈ​ពេល​វែង​ពេក។ ចំណុច​នេះ គឺ​ធម្មតា​តែ​ប៉ុណ្ណោះ ហើយ​គ្មាន​អ្វី​គួរ​ឱ្យ​ព្រួយ​បារម្ភ​នោះ​ឡើយ។

ប៉ុន្តែ ពេល​ខ្លះ ប្រសិន​បើ​កុមារ​ខ្វះ​ការ​លេង ឬ​ខ្វះ​ចំណង់​លេង វា​អាច​ជា​សញ្ញា​បង្ហាញ​ឱ្យ​ដឹង​ថា​ពួក​គេ​កំពុង​មាន​បញ្ហា​ផ្នែក​លូតលាស់៕

អត្ថបទដើម៖ Why play is important

ការអភិវឌ្ឍខួរក្បាល និងការសិក្សារបស់កុមារតូចៗ

on Monday, 05 February 2018. Posted in Classes, Parenting Tips, Activities

170921161253 1 540x360

បទ​ពិសោធន៍​របស់​កុមារ​តូចៗ​មាន​ឥទ្ធិពល និង​កំណត់​ពី​វិធី​ដែល​ខួរ​ក្បាល​អភិវឌ្ឍ។

សូម​ស្វែង​យល់​ទាំង​អស់​គ្នា​ពី​វិធី​ដែល​អាច​ជួយ​កូនៗ​អាច​រំញោច​ការ​វិវឌ្ឍ​ខួរ​ក្បាល និង​ការ​សិក្សា​តាំង​ពី​វ័យ​តូចៗ​របស់​កូន និង​ជួយ​ពួក​គេ​ឱ្យ​ឈាន​ដល់​ចំណុច​ដែល​ជា​សក្ដា​នុភាព​សម្រាប់​អនាគត​របស់​ពួក​គេ។

ខួរ​ក្បាល​របស់​កុមារ

តើ​យើង​នឹង​នៅ​កន្លែង​ណា​បើ​សិន​ជា​យើង​មិន​មាន​ខួរ​ក្បាល?

យន្តការ​ដ៏​គួរ​ឱ្យ​ភ្ញាក់​ផ្អើល​នេះ​គ្រប់គ្រង​រាល់​ទង្វើ​ដែល​យើង​ធ្វើ ផ្ដើម​ចេញ​ពី​ការ​ញ៉ាំ និង​ផឹក ដល់​ការ​គិត​ ការ​រៀន និង​ការ​ទទួល​យក​នូវ​បទ​ពិសោធន៍​ផ្នែក​អារម្មណ៍​ជា​ដើម។

កុមារ​ម្នាក់​មាន​កោសិកា​ខួរ​ក្បាល 100 ពាន់​លាន និង​មាន​ទំនាក់​ទំនង 5 ពាន់​កោរដិ។ អំឡុង​ពេល​ពីរ​បី​ខែ​ដំបូង ចំនួន​នៃ​ទំនាក់​ទំនង​នេះ​កើន​ឡើង​គុណ​នឹង 20 ដង។ កោសិកា​ខួរ​ក្បាល​នីមួយៗ​អាច​ភ្ជាប់​ជាមួយ​នឹង​កោសិកា​ផ្សេងៗ​ទៀត​បាន​ច្រើន​ជាង 15000។

កុមារ​អាយុ 3 ឆ្នាំ​ម្នាក់​មាន​ការ​ភ្ជាប់​រវាង​ខួរ​ក្បាល​មាន​ច្រើន​ជាង​មនុស្ស​ពេញ​វ័យ 2 ដង ហើយ​ប្រសិន​បើ​គេ​មិន​ប្រើ​វា​ទេ វា​នឹង​បាត់​បង់។ ពេល​ដែល​កុមារ​ចាប់​ផ្ដើម​មាន​អាយុ 5 ឆ្នាំ ទំនាក់​ទំនង​ខួរ​ក្បាល 90% នឹង​ចាប់​ផ្ដើម​ចង​ជា​បណ្ដុំ។

កុមារ​នឹង​មិន​មាន​ពេល​សាក​ល្បង​ទទួល​យក​បទ​ពិសោធន៍ និង​ឱកាស​នានា​ដែល​មាន​សារ​សំខាន់​ជាង​ពេល​ដែល​ពួក​គេ​នៅ​តូច​ឡើយ។

ការ​អភិវឌ្ឍ​ខួរ​ក្បាល និង​ការ​សិក្សា​នៅ​វ័យ​តូចៗ
ខួរ​ក្បាល​ជា​ផ្នែក​គ្រប់គ្រង​កណ្ដាល​នៃ​រាង​កាយ​របស់​យើង ប៉ុន្តែ​ តើ​យើង​ធ្វើ​យ៉ាង​ណា​ទើប​អាច​ជួយ​ខួរ​ក្បាល​កូនៗ​ឱ្យ​ឈាន​ដល់​ចំណុច​សក្ដានុពល​នោះ?

 
បទ​ពិសោធន៍​នៃ​ការ​ប្រើ​ញាណ​នៅ​វ័យ​ដំបូង​បង្កើត​នូវ​ការ​ផ្សារ​ភ្ជាប់​ថ្មី​រវាង​កោសិកា​ខួរ​ក្បាល និង​បទ​ពិសោធន៍​ដែល​ជំរុញ​ការ​អភិវឌ្ឍ។

ចំនួន​នៃ​ការ​ភ្ជាប់​រវាង​កោសិកា​ខួរ​ក្បាល កើន​ឡើង ឬ​ថយ​ចុះ អាស្រ័យ​លើ​បរិយាកាស និង​បទ​ពិសោធន៍​ដែល​កុមារ​ទទួល​យក។

កុមារ​បន្ត​រៀន​សូត្រ​ពេញ​មួយ​ជីវិត ប៉ុន្តែ ពួក​គេ​មិន​ចាប់​យក​ជំនាញ​ថ្មី​បាន​លឿន​ដូច​ជា​កាល​ពី​ពួក​គេ​នៅ​តូចៗ​ឡើយ។

ទន្ទឹម​នឹង​នេះ​ដែរ វា​ក៏​សំខាន់​ក្នុង​ការ​ផ្ដល់​​ឱកាស​ដ៏​អស្ចារ្យ​​សម្រាប់​​ការ​​សិក្សា និង​អភិវឌ្ឍ​ក្នុង​អំឡុង​ពេល​លូត​លាស់​ដំបូង​ពេល​ដែល​ចិត្ត​របស់​ពួកគេ​កំពុង​ត្រៀម​ខ្លួន​ទទួល​យក​ព័ត៌មាន​ថ្មីៗ។

វិធី 9 យ៉ាងក្នុងការរំញោចការអភិវឌ្ឍខួរក្បាលរបស់កុមារ

កុមារ​ត្រូវ​ការ​បង្ហាញ​ផ្លូវ​ដែល​អាច​ស្វែង​រក​នូវ​ព័ត៌មាន​ថ្មី និង​បទ​ពិសោធន៍​ថ្មី​ដែល​មាន​ភាព​ប្រកួត​ប្រជែង​ និង​អាច​ឱ្យ​គេ​ពង្រីក​ការ​គិត និង​ការ​យល់​ដឹង។

ពួក​គេ​គួរ​តែ​សាកល្បង​វិធី​សាស្ត្រ​ផ្សេងៗ​ដើម្បី​រៀន ដូច​នឹង​ឱកាស​ដែល​ទាក់​ទង​ជាមួយ​នឹង​ប្រភព​នៃ​ការ​សិក្សា​ផ្សេងៗ​ជា​ដើម។
ឧទាហរណ៍៖

1. ការលេង

ការ​លេង​មិន​ត្រឹម​តែ​សប្បាយ​ប៉ុណ្ណោះ​ទេ តែ​ក៏​ជា​មូលដ្ឋានគ្រឹះ​អាច​ឱ្យ​កុមារ​រៀន​បាន​ផង​ដែរ។

ប្រើ​ហ្គេម ប្រដាប់​លេង និង​សម្ភារ​សិក្សា​ដែល​កុមារ​អាច​ប្រើ​សម្រាប់​រៀន។

កុមារ​នឹង​ផ្សារ​ភ្ជាប់​ការ​លេង​កាន់​តែ​យូរ​ជាមួយ​នឹង​ប្រភព​ធនធាន​ដែល​ស្រដៀង​នឹង​បរិយាកាស​ដែល​ពួក​គេ​កំពុង​រស់​នៅ។

2. ការនិយាយ

ដើម្បី​ឱ្យ​កោសិកា​ខួរ​ក្បាល​មាន​ចលនា ចាប់​ផ្ដើម​និយាយ។ កុមារ​តូចៗ​ចាប់​យក​គ្រប់​ពាក្យ។ ពេល​ដែល​អ្នក​ចែក​រំលែក​ទៅ​ពួក​គេ​កាន់​តែ​ច្រើន ពួក​គេ​រៀន​កាន់​តែ​ច្រើន​ដូច​គ្នា។

អ្វី​ដែល​អ្នក​និយាយ​មិន​សំខាន់​ដូច​របៀប​ដែល​អ្នក​និយាយ និង​សំឡេង​ដែល​អ្នក​ប្រើ​នោះ​ទេ។

កុមារ​តូចៗ​ត្រូវ​ការ​ឮ​ប្រយោគ​ឃ្លា​ពេញ​ដើម្បី​​អភិវឌ្ឍ​ពាក្យ​របស់​ពួក​គេ។

លោក​អ្នក​អាច​ជួយ​កូនៗ​របស់​លោក​អ្នក​ក្នុង​ការ​ប្រើ​ពាក្យ​ដើម្បី​ឱ្យ​ពួកគេ​មាន​ការ​យល់​ដឹង​ពី​ពិភព​ជុំវិញ​ពួក​គេ ក្នុង​នោះមាន​ដូច​ជា​ពាក្យ​ដែល​រៀប​រាប់​ពី​អារម្មណ៍ វត្ថុ​នានា និង​សម្ភារ​ប្រើ​ប្រចាំ​ថ្ងៃ។

ជំនួស​ឱ្យ​ការ​និយាយ​ថា “នោះ! មើល​ទៅ​មេឃ!” លោក​អ្នក​ត្រូវ​និយាយ​ថា “នោះ​មើល​ផ្ទៃ​មេឃ​ពណ៌​ខៀវ​ស្រឡះ។” វិញ។

ព្យាយាម​ឆ្លើយ​សំណួរ​ដែល​អ្នក​សួរ។ ប្រសិន​បើ​អ្នក​មិន​អាច​ឆ្លើយ​ទេ អ្នក​គួរ​តែ​នាំ​គេ​ស្វែង​រក​ចម្លើយ​ទាំង​អស់​គ្នា​តាម​រយៈ​ការ​អាន​សៀវភៅ ឬ​ប្រើ​អ៊ិនធើណែត តាម​វិធី​ណា​មួយ​ដែល​អាច​ធ្វើ​បាន។

3. ការអាន

ការ​អាន ឬ​ការ​ស្វែង​រក​អ្វី​មួយ​តាម​រយៈ​សៀវភៅ​ជាមួយ​កូន​របស់​អ្នក​ពិត​ជា​សំខាន់ ប៉ុន្តែ ការ​សួរ​សំណួរ​ និង​ការ​បង្កើត​ការ​ពិភាក្សា​លើ​អ្វី​ដែល​អ្នក​បាន​អាន និង​រូបភាព​ដែល​អ្នក​បាន​ឃើញ គឺ​ជា​វិធី​ដ៏​ល្អ​ក្នុង​ការ​ពង្រីក​ការ​គិត និង​ការ​រៀន​របស់​កូនៗ។

តើ​អ្នក​គួរ​អាន​ឱ្យ​កូនៗ​ទើប​កើត ឬ​ក្មេង​តូចៗ​ស្ដាប់​ដែរ​ទេ? ចម្លើយ​នោះ គឺ​ពិត​ជា​ត្រូវ​អាន ព្រោះ​ថា​កុមារ​មិនមែន​ក្មេង​ពេក ឬ​ចាស់​ពេក​ក្នុង​ការ​ស្ដាប់​ការ​អាន​របស់​អ្នក​ឡើយ​។

4. តន្រ្តី

តន្រ្តី​​ផ្សារ​ភ្ជាប់​គ្រប់​ចំណុច​ទាំង​អស់​នៃ​ខួរ​ក្បាល និង​រំញោច​ដល់​តួនាទី​ខួរ​ក្បាល​ជា​ច្រើន​ឱ្យ​មាន​ចលនា​។

កុមារ​គួរ​តែ​ទទួល​បាន​នូវ​បទពិសោធន៍​ពី​តន្រ្តី​ច្រើន​ប្រភេទ​ផ្សេងៗ​គ្នា ជា​ពិសេស​បទ​ភ្លេង និង​ការ​ច្រៀង​តាម​តន្រ្តី ឬ​ចម្រៀង។

5. សិល្បៈ

សិល្បៈ​ផ្សារ​ភ្ជាប់​ចំណុច​នានា​នៃ​ខួរ​ក្បាល​ដែល​ជួយ​ដល់​ការ​ពង្រីក​ការ​សិក្សា​ញាណ ការ​យល់​ដឹង​ អារម្មណ៍ និង​កាយ​សម្បទា​របស់​កុមារ។

កុមារ​គួរ​តែ​ទទួល​បាន​នូវ​ឱកាស​ច្រើន​ក្នុង​ការ​គូរ លាប​ពណ៌ សាង​សង់ និង​បង្កើត​វត្ថុ​សិល្បៈ​នានា។

6. ចលនា/ការហាត់ប្រាណ

ការ​ហាត់​ប្រាណ​អាច​ធ្វើ​ឱ្យ​បេះដូង​លោត​ញាប់​ជាង​មុន គឺ​មាន​ប្រយោជន៍​ដល់​ការ​អភិវឌ្ឍ​កាយ​សម្បទា​របស់​កុមារ និង​ជួយ​ឱ្យ​ពួក​គេ​មាន​អារម្មណ៍​ល្អ។

អ្នក​វិទ្យាសាស្ត្រ​បាន​រក​ឃើញ​ថា បន្ទាប់​ពី​កុមារ​បាន​ធ្វើ​ការ​ហាត់​ប្រាណ រាង​កាយ​របស់​ពួកគេ​ចាប់​ផ្ដើម​បង្កើត​សារធាតុ​ម្យ៉ាង​ដែល​អនុញ្ញាត​ឱ្យ​ខួរ​ក្បាល​របស់​ពួកគេ​មាន​ការ​សិក្សា​ប្រសើរ​ជាង​មុន។

សកម្មភាព និង​ចលនា​រាង​កាយ​ជំរុញ​ឱ្យ​ខួរ​ក្បាល​មាន​ការ​អភិវឌ្ឍ និង​ជួយ​ឱ្យ​ខួរ​ក្បាល​មាន​ទំនាក់​ទំនង​ក្នុង​ការ​សិក្សា​កាន់​តែ​លូត​លាស់។

ការ​ហាត់​ប្រាណ​ជា​ប្រចាំ និង​ការ​ចូលរួម​ក្នុង​សកម្មភាព​កីឡា​ផ្សេងៗ​មាន​សារ​សំខាន់​ក្នុង​ធ្វើ​ឱ្យ​មាន​ការ​អភិវឌ្ឍ​សុខភាព​ខួរ​ក្បាល​របស់​កុមារ​ល្អ។

7. ក្ដីស្រឡាញ់

ទំនាក់​ទំនង​ដែល​មាន​ការ​គាំទ្រ និង​ការ​ស្រឡាញ់ គឺ​ជា​អាហារ​ដ៏​ល្អ​សម្រាប់​ការ​លូតលាស់​របស់​ខួរ​ក្បាល​របស់​កុមារ។

កុមារ​រៀន​ពី​ការ​ខ្វាយ​ខ្វល់ និង​វិធី​ទទួល​យក​អារម្មណ៍​តាន​តឹង​ដែល​អ្នក​ផ្ដល់​ឱ្យ ដូច្នេះ ប្រសិន​បើ​អ្នក​មាន​ភាព​តាន​តឹង​ក្នុង​ចិត្ត កូន​របស់​អ្នក​នឹង​មាន​ដូច​គ្នា។

កូន​របស់​អ្នក​ត្រូវ​ការ​ឱ្យ​អ្នក​ស្រឡាញ់​ពួក​គេ ថ្នាក់​ថ្នម​ពួក​គេ និង​លើក​ទឹក​ចិត្ត​ពួក​គេ។

តាម​ការ​ស្រាវជ្រាវ​នាពេល​ថ្មីៗ​នេះ​បាន​រក​ឃើញ​ថា ការ​អភិវឌ្ឍ​របស់​ខួរ​ក្បាល​ពី 30 ទៅ 60 ភាគ​រយ​អាស្រ័យ​លើ​ទំនាក់​ទំនង​ជាមួយ​នឹង​បរិយាកាស និង​មនុស្ស​ជុំវិញ។

8. អាហារូបត្ថម្ភ

អ្នក​ត្រូវ​ប្រាកដ​ថា​កូន​របស់​អ្នក​ញ៉ាំ​អាហារ​ដែល​ជួយ​ដល់​ការ​លូត​លាស់ និង​ដំណើរ​ការ​របស់​ខួរ​ក្បាល​ ដែល​អាហារ​ទាំង​នោះ​មាន​ដូច​ជា បន្លែ​ពណ៌​បៃតង គ្រាប់​សណ្ដែកដី ត្រី ផ្លែ​ឈើ​ស្រស់ សាច់​សត្វ និង​អាហារ​ដែល​មាន​ជាតិ​ទឹកដោះគោ។

ចំណែក​ឯ​វីតាមីន និងជាតិរ៉ែ​ចាំ​បាច់​ប្រចាំថ្ងៃ​ក៏​មាន​ចំណែក​ក្នុង​ការ​វិវឌ្ឍ​របស់​ខួរ​ក្បាល​ផង​ដែរ។

សូម​លើក​ទឹក​ចិត្ត​កូនៗ​របស់​អ្នក​ឱ្យ​ផឹក​ទឹក​ឱ្យ​បាន​គ្រប់​គ្រាន់ ព្រោះ​វា​អាច​ជួយ​កូនៗ​អ្នក​ឱ្យ​មាន​ស្មារតី​ល្អ ​ព្រម​ទាំង​គ្រប់​គ្រង​កម្រិត​ថាមពល​ក្នុង​រាង​កាយ​របស់​ពួកគេ​បាន​ទៀត​ផង។

9. ការគេង

ពេល​ដែល​កុមារ​គេង​លក់ ខួរ​ក្បាល​របស់​ពួកគេ​ដំណើរ​ការ​រាល់​នូវ​ព័ត៌មាន​ដែល​ពួកគេ​ទទួល​បាន​នៅ​ពេល​ថ្ងៃ។

ក្នុង​អំឡុង​ពេល​នេះ ការ​ចង​ចាំ​របស់​កុមារ​មាន​ភាព​ខ្លាំង និង​អាច​ចាប់​យក​ជំនាញ និង​កិច្ចការ​ថ្មីៗ​បាន​យ៉ាង​រហ័ស។

ដូច្នេះ វា​ពិត​ជា​ចាំបាច់​សម្រាប់​កុមារ​ក្នុង​ការ​គេង​សម្រាក​ឱ្យ​បាន​គ្រប់គ្រាន់ ដែល​តម្រូវ​ការ​គេង​នោះ គឺ​ចន្លោះ​ពី 9 ទៅ 10 ម៉ោង​ក្នុង​មួយ​ថ្ងៃ។

ការ​អភិវឌ្ឍ​ខួរ​ក្បាល​របស់​កុមារ​ គឺ​ជា​គន្លឹះ​សម្រាប់​អនាគត​របស់​ពួក​គេ។ ក្នុង​ឆ្នាំ​ដំបូង​នៃ​កំណើត​របស់​ពួកគេ​មាន​ផល​ប៉ះ​ពាល់​ទៅ​លើ​ការ​អភិវឌ្ឍ​ខួរ​ក្បាល​របស់​កុមារ ទោះ​បី​ជា​ឆ្នាំ​ទាំង​នោះ​កន្លង​ទៅ​ឆាប់​រហ័ស​ក៏​ដោយ។

ចូរ​ចំណាយ​ពេល​លេង និយាយ អាន ច្រៀង សើច រាំ បង្កើត និងសប្បាយ​ជាមួយ​កូន​ឱ្យ​បាន​ច្រើន។

ជំរុញ​កូនៗ​ឱ្យ​ញ៉ាំ​អាហារ​ដែល​ផ្ដល់​នូវ​សុខភាព​ល្អ គេង​បាន​គ្រប់​គ្រាន់ ប៉ុន្តែ អ្វី​ដែល​សំខាន់​ជាង​គេ​នោះ​ គឺ​ការ​បង្ហាញ​ក្ដី​ស្រឡាញ់​ចំពោះ​កូន​ឱ្យ​បាន​ច្រើន​តាម​ដែល​អាច​ធ្វើ​ទៅ​បាន។

កូន​របស់​អ្នក​នឹង​មាន​ជីវិត​ពោរ​ពេញ​ទៅ​ដោយ​សក្ដានុពល​ប្រសិន​បើ​មាន​ការ​ជួយ​ជ្រោម​ជ្រែង​ពី​អ្នក៕

អត្ថបទដើម៖ Early brain development & learning

តើថ្នាក់អប់រំកុមារតូចជួយកុមារក្នុងការអភិវឌ្ឍជំនាញជីវិតអ្វីខ្លះ?

on Tuesday, 23 January 2018. Posted in Classes, Parenting Tips, Activities

គ្រប់​ពាក្យ​ដែល​កុមារ​រៀន គ្រប់​អាកប្បកិរិយា​ដែល​កុមារ​បញ្ចេញ និង​គ្រប់​បទពិសោធន៍​ថ្មីៗ​ដែល​កុមារ​ជួប​ប្រទះ គឺ​ជា​ការ​បណ្ដាក់​ទុន​សម្រាប់​អនាគត​របស់​ពួក​គេ។ ការ​អប់រំ​កុមារ​តូច គឺជា​ការ​សំលៀង និង​បង្កើត​រូបរាង​ឱ្យ​កុមារ​ដែល​ជា​មូលដ្ឋានគ្រឹះ​សម្រាប់​ដំណើរ​ជីវិត​របស់​ពួកគេ។ ខាង​ក្រោម​នេះ គឺ​ជា​អត្ថប្រយោជន៍​ដែល​បាន​ផ្ដល់​ដោយ​ការ​អប់រំ​កុមារ​តូច។

nursery edu to primary with diana

ការរៀនសហការ

ការ​​អប់រំ​​កុមារ​​តូច​​អនុញ្ញាត​​កុមារ​​​ឱ្យ​រៀន​ពី​ការ​​សហការ ចែក​​រំលែក ខំ​​ព្យាយាម និង​​ផ្លាស់​​ប្ដូរ​​វេន​​ក្នុង​​បរិយាកាស​​កន្លែង​​ដែល​​មាន​​សុវត្ថិភាព​​ក្នុង​​ការ​​រៀន​​ដែល​​មាន​​អ្នក​​ជំនាញ​​​ចាំ​ណែនាំ​​ពួក​​គេ។ បើ​​ទោះ​​បី​ជា​​វា​​អាច​​នឹង​​​ជា​​មេរៀន​​​ដ៏​​ពិបាក វា​​ក៏​​អាច​​ជា​​ការ​​ចាំបាច់​​សម្រាប់​​កុមារ​​ក្នុង​​ការ​​រៀន​​សហការ​​ជាមួយ​​អ្នក​​ដទៃ​​តាំង​​​ពី​​វ័យ​​ក្មេង។

ការយល់ដឹងពីការចូលក្នុងសង្គម

ការ​​ចូល​​ចំណោម​​ជាមួយ​​អ្នក​​ដទៃ​​ក្រៅ​ពី​​គ្រួសារ​​ដែល​​ជា​​តំបន់​​មាន​​សុវត្ថិភាព​​ដល់​​កុមារ​នោះ​ គឺ​​ជា​មូលដ្ឋានគ្រឹះ​ដំបូង​ដើម្បី​ឈាន​ទៅ​ដល់​ចំណុច​ផ្សេងៗ​ទៀត​នៅ​ក្នុង​ជីវិត​របស់​កុមារ។ ឪពុក​ម្ដាយ​យល់​ពី​ភាព​សំខាន់​នៃ​ការ​ណែនាំ​កូនៗ​ឱ្យ​ក្មេង​ដទៃ និង​គាំទ្រ​ការ​ផ្លាស់ប្ដូរ​របស់​ពួកគេ​នៅ​ក្នុង​ក្រុម​ផ្ទាល់​ខ្លួន។ ការ​អនុញ្ញាត​កូនៗ​ឱ្យ​រាប់​អាន​ជាមួយ​ក្មេង​ដទៃ​អាច​ជួយ​ពួក​គេ​ឱ្យ​ជំនះ​ភាព​ខ្មាស់​អៀន និង​បង្កើន​ទំនុក​ចិត្ត​លើ​ខ្លួន​ឯង។

ការ​អភិវឌ្ឍជាមូលដ្ឋានសម្រាប់ផ្នែកសំខាន់ៗ

ការ​អភិវឌ្ឍ​ជាមូលដ្ឋាន គឺ​ជា​ការ​កសាង​នូវ​មូលដ្ឋានគ្រឹះ​ដ៏​រឹង​មាំ​សម្រាប់​ការ​អភិវឌ្ឍ​ផ្នែក​សង្គម រាង​កាយ​ ចិត្ត​សាស្ត្រ និង​អារម្មណ៍។ គ្រូ​បង្រៀន​កុមារ​តូច​ត្រូវ​បាន​បណ្ដុះ​បណ្ដាល​ឱ្យ​មាន​ការ​ប្ដេជ្ញា​ចិត្ត​ក្នុង​ការ​ធ្វើ​ជា​ជំនួយ​សម្រាប់​គ្រប់​កុមារ និង​បង្កើត​សកម្មភាព និង​កម្មវិធី​សម្រាប់​ពួក​គេ។ ជាមួយគ្នា​នេះ​ផង​ដែរ មិត្ត​ភក្ដិ​ក៏​មាន​សារ​សំខាន់​សម្រាប់​ករណី​នេះ​ដែរ ព្រោះ​សិស្ស​ថ្នាក់​មត្តេយ្យ​កម្រិត​ទាប​ត្រូវ​បាន​រាប់​បញ្ចូល​ក្នុង​សកម្មភាព​ដែល​មាន​ការ​សហការ​គ្នា និង​អាច​ជួយ​បាន។

មានភាពរីករាយ និងកម្លាំងក្នុងការរៀនមិនឈប់ឈរ

មេរៀន​ត្រូវ​តែ​ផ្ដល់​ជូន​សម្រាប់​កុមារ​ក្នុង​លក្ខណៈ​ដ៏​គួរ​ឱ្យ​ចាប់​អារម្មណ៍ និង​សប្បាយៗ​ដែល​អាច​ជំរុញ​ទឹក​ចិត្ត​កុមារ​ឱ្យ​ក្លាយ​ជា​អ្នក​រៀន​សូត្រ​ដ៏​មាន​ប្រសិទ្ធ​ភាព។ វា​ជា​ការ​ពិត​ក្នុង​ការ​ធ្វើ​ជា​គំរូ​សម្រាប់​កុមារ​ទាំង​នេះក្នុង​ការ​រៀន​សូត្រ​ប្រកប​ដោយ​ភាព​រីករាយ និង​ចំណង់។ ក្ដី​ស្រឡាញ់​របស់​កុមារ​ដែល​មាន​ចំពោះ​ការ​សិក្សា​ត្រូវ​ចាក់​គ្រឹះ​តាំង​ពី​ពេល​ពួក​គេ​ដល់​វ័យ​ចូល​រៀន​ថ្នាក់​មត្តេយ្យ​កម្រិត​ទាប។

ការយល់ដឹងពីគុណតម្លៃនៃការសិក្សាតាមរយៈបទពិសោធន៍

អ្នក​អប់រំ​ថ្នាក់​អប់រំ​កុមារ​តូច​ត្រូវ​ធ្វើ​ជា​គំរូ និង​ផ្ដល់​​នូវ​បទ​ពិសោធន៍​ជាក់​ស្ដែងដើម្បី​ជួយ​ពួក​គេ​ឱ្យ​ចាប់​យក​តម្លៃ​នៃ​ការ​សិក្សា និង​ការ​រៀន​សូត្រ​កាន់​តែ​មាន​ប្រសិទ្ធភាព​ជាង​មុន។ ទោះបី​ជា​ឪពុកម្ដាយ គឺ​ជា​ផ្នែក​មួយ​ដែល​មាន​ឥទ្ធិពល​ខ្លាំង​បំផុត​របស់​សម្រាប់​កុមារ ក៏​ប៉ុន្តែ ការ​ឱ្យ​ពួក​គេ​ចូល​រៀន​នៅ​សាលារៀន​ក៏​អាច​ផ្ដល់​នូវ​បរិយាកាស​ថ្មី​នៅ​ក្នុង​ការ​អប់រំ​ដែល​នៅ​ជាមួយ​គេ​ក្នុង​ដំណើរ​ជីវិត​នៃ​ការ​សិក្សា​ទៅ​អនាគត។

ការរៀនអំពីគុណតម្លៃនៃការគោរព

ថ្នាក់​រៀន​មតេយ្យ​កម្រិត​ទាប​បង្រៀន​កុមារ​ឱ្យ​ចេះ​ស្គាល់​ពី​គុណ​តម្លៃ​នៃ​ការ​គោរព​សម្រាប់​អ្នក​ដទៃ។ នេះ​រួម​បញ្ចូល​ទាំង​មនុស្ស កម្មសិទ្ធិ និង​បរិស្ថាន។ សកម្មភាព​នេះ​នឹង​មាន​ភាព​កាន់​តែ​ប្រសើរ​ឡើង​សម្រាប់​ការ​រៀន​នៅ​សាលា​ដែល​កុមារ​ចែក​រំលែក​របស់​ផ្សេងៗ និង​គ្រូ​បង្រៀន​បង្រៀន​ពី​របៀប​របប និង​កាតព្វ​កិច្ច​របស់​ប្រជាជន។

ការដឹងពីរបៀបធ្វើការជាក្រុម

ការ​អប់រំ​ថ្នាក់​មត្តេយ្យ​កម្រិត​ទាប​បង្ហាញ​ពី​សារសំខាន់​នៃ​ការងារ​ក្រុម​ដែល​អាច​បង្រៀន​ឱ្យ​ពួក​គេ​ចេះ​គោរព​គំនិត ឬ​មតិ​របស់​អ្នក​ដទៃ។ ទន្ទឹម​នឹង​នេះ​ផង​ដែរ វា​ក៏​អាច​បង្រៀន​ពី​គុណ​តម្លៃ​នៃ​ការ​ស្ដាប់ និង​សមភាព។ សកម្មភាព​ថ្នាក់​មត្តេយ្យ​កម្រិត​ទាប​ជា​ច្រើន​ផ្ដោត​សំខាន់​ទៅ​លើ​ការងារ​ក្រុម ពី​ព្រោះ​បុគ្គល​ដែល​អាច​រៀន​ពី​វិធី​ធ្វើការ​ក្នុង​ក្រុម​ពេល​ដែល​ពួកគេ​មាន​វ័យ​តូចៗ​នឹង​ងាយ​ស្រួល​ក្នុង​ការ​សម្រប​តាម​ស្ថានភាព​ផ្សេងៗ និង​អាច​ទទួល​បាន​ការងារ​រហ័ស។

ការអភិវឌ្ឍភាពអំណត់

ឪពុក​ម្ដាយ និង​គ្រូ​បង្រៀន​ថ្នាក់​អប់រំ​កុមារ​តូច​ត្រូវ​តែ​ធ្វើ​ការ​ជាមួយ​គ្នា​ដើម្បី​ជួយ​កូនៗ​ឱ្យ​អាច​អភិវឌ្ឍ​ភាព​អត់​ធ្មត់​តាំង​ពី​នៅតូច។ ដោយ​ការ​អភិវឌ្ឍ​នូវ​បរិយាកាស​មួយ​ដែលមាន​សុវត្ថិភាព យុត្តិធម៌ និង​មាន​ទំនាក់ទំនង​ជាមួយ​មនុស្ស​ជុំវិញ គឺ​ជា​ការ​បង្កើត​នូវ​ការ​រំពឹង​ទុក​ដ៏​ប្រាកដ ហើយ​ក្មេងៗ​ក៏​អាច​មាន​សមត្ថភាព​អភិវឌ្ឍ​ជំនាញ​របស់​ពួកគេ​ក្នុង​ការ​គ្រប់គ្រង​អារម្មណ៍ និង​ខ្លួន​ពួក​គេ។

គ្រូ​បង្រៀន​ត្រូវ​តែ​ផ្ដល់​នូវ​បរិយាកាស​ដ៏​ប្រកួត​ប្រជែង​មួយ​ដែល​កុមារ​អាច​រៀន​តាម​រយៈ​ការ​អនុវត្ត​តាំង​ពី​លើក​ដំបូង។ បើ​ទោះបី​ជា​កុមារ​មាន​ការ​វាយ​តប់​គ្នា ឬ​ធ្លាប់​ចាញ់​ហ្គេម​ជា​ញឹកញាប់​ក៏​ដោយ​ នេះ​គឺ​ជា​មូលដ្ឋានគ្រឹះ​ក្នុង​ការ​បង្កើត​នូវ​វិធីសាស្ត្រ​សម្រាប់​ការ​ប្រកួត​ប្រជែង​ក្នុង​ជីវិត​កាន់​តែ​ប្រសើរ។

ការអភិវឌ្ឍជំនាញដើម្បីផ្ដោតអារម្មណ៍ក្នុងការធ្វើអ្វីមួយ

ក្នុង​អំឡុង​ពេល​រៀន​ថ្នាក់​អប់រំ​កុមារ​តូច កុមារ​អាច​រុក​រក​គ្រប់​ឱកាស​ទាំង​អស់​ដែល​អាច​ឱ្យ​ពួក​គេ​ស្វែង​យល់​ពី​បទពិសោធន៍​ថ្មីៗ បរិយាកាស​ថ្មី និង​មិត្ត​ភក្ដិ​ថ្មី​ជា​ដើម។ ពួកគេ​មាន​ចិត្ត​ស្រមើ​ស្រមៃ និង​ប្រកប​ដោយ​ថាមពល។

ការអនុវត្តភាពអត់ធ្មត់

ជា​រៀងរាល់​ថ្ងៃ មនុស្ស​ពេញវ័យ​ត្រូវ​ឆ្លង​ការ​នូវ​ស្ថានភាព​គ្រប់​បែប​យ៉ាង​ដែល​ភាព​អត់ធ្មត់​របស់​ពួកគេ​ត្រូវ​បាន​គេ​យក​មក​សាក​ល្បង។ កុមារ​ត្រូវ​ការ​ឱកាស​ដើម្បី​ប្រឡូក​ចូល​ក្នុង​បទពិសោធន៍​សង្គម​យ៉ាង​ច្រើន​ដែល​បទពិសោធន៍​ទាំង​នោះ​អាច​ឱ្យ​ពួកគេ​ស្វែង​រក និង​អនុវត្ត​ភាព​អត់ធ្មត់​របស់​ពួក​គេ។ ការ​បង្រៀន​តាម​រយៈ​ការ​ផ្ដល់​ជា​គំរូ បទ​ពិសោធន៍​សង្គម និង​ឧទាហរណ៍​នឹង​ជួយ​ពួក​គេ​ឱ្យ​អភិវឌ្ឍ​ភាព​អំណត់​របស់​ពួក​គេ និង​ស្វែង​យល់​ពី​សារ​សំខាន់​នៃ​ការ​រង់ចាំ​ដើម្បី​ដល់​វេន​របស់​ពួក​គេ។ នៅ​ក្នុង​សាលា​ដែល​មាន​ថ្នាក់​មត្តេយ្យ​កម្រិត​ទាប មាន​ការ​រៀប​ចំ​ទោង​ឱ្យ​កុមារ​ជិះ​លេង​កម្សាន្ត ហើយ​កុមារ​ត្រូវ​តែ​ចែក​រំលែក​កន្លែង​លេង​តាម​លំដាប់​លំដោយ៕

អត្ថបទដើម៖ How Early Childhood Education Helps a Child Develop his Life Skills

ការពិតដ៏គួរឱ្យចាប់អារម្មណ៍ទាំង ៤ យ៉ាងអំពីកូនរបស់អ្នក

on Friday, 12 January 2018. Posted in Parenting Tips, Activities

599aa6451900002500dd4900

តើ​អ្នក​ដឹង​ពី​កូន​បាន​ច្រើន​កម្រិត​ណា​ដែរ? ប្រហែល​ជា​មាន​ថ្ងៃ​ខ្លះ​អ្នក​ភ្ញាក់​ផ្អើល​ពេល​ដែល​ឃើញ​កូន​និយាយ​ពាក្យ​ដែល​អ្នក​មិន​ដឹង ហើយ​ពេល​ខ្លះ​ទៀត អ្នក​ឃើញ​គេ​កំពុង​រាំ​យ៉ាង​ស្ទាត់​ជំនាញ​នៅ​ក្នុង​បន្ទប់​ពេល​ដែល​គេ​ឮ​បទ​ចម្រៀង។ ទាំង​នេះ​គ្រាន់​តែ​ជា​ទេពកោសល្យ​ដែល​លាក់​ទុក​ក្នុង​ពួកគេ​ដែល​យើង​មិន​ដឹង​ថា​ពួកគេ​មាន​តែ​ប៉ុណ្ណោះ។

ដូច​នេះ សូម​អ្នក​ទាំងអស់​គ្នា​មក​ស្វែង​យល់​ពី​ចំណុច​នានា​ដូច​តទៅ៖

តើ​ដឹង​ទេ​ថា​កូន​ក្មេង​ទាំងអស់​សុទ្ធតែ​គួរ​ឱ្យ​ស្រឡាញ់?
ទូទៅ គ្រប់​ទារក​ដែល​ទើប​កើត​ទាំង​អស់​សុទ្ធ​តែ​គួរ​ឱ្យ​ស្រឡាញ់ មិន​ថា​ពួក​គេ​ជា​ជន​ជាតិ​អ្វី​ឡើយ។ ជា​ការ​ពិត​ណាស់ មាន​អ្នក​វិទ្យាសាស្ត្រ​មួយ​បាន​បង្កើត​ទ្រឹស្ដី “គម្រោង​ទារក” ដែល​គម្រោង​នេះ​បង្ហាញ​ដល់​ពួក​យើង​ពី​លក្ខណៈ​ស្រដៀង​គ្នា​របស់​ទារក។

ទារក​ភាគ​ច្រើន​មាន​ក្បាល​មូល ភ្នែក​ធំៗ ថ្ពាល់​ធំៗ និង​រាង​កាយ​ទន់។ ហេតុ​ដូច​នេះ​ហើយ​ទើប​ពេល​ដែល​យើង​ឃើញ​ទារក​ម្ដង​ណា យើង​អាច​ប្រើ​ពាក្យ​បរិយាយ​ពី​គេ​បាន​តែ​មួយ​គត់​ គឺគួរ​ឱ្យ​ស្រឡាញ់។

តើ​អ្នក​មាន​ដឹង​ទេ​ថា​ឪពុក​ម្ដាយ និង​បរិយាកាស​ជុំវិញ​ពួក​គេ​មាន​ឥទ្ធិពល​ធំ​បំផុត​លើ​កូនៗ?

ឥរិយាបថ និង​អាកប្បកិរិយា​របស់​កូន​ក្មេង​ភាគ​ច្រើន​ត្រូវ​បាន​ចម្លង​មក​ពី​គ្រួសារ​របស់​គេ និង​បរិយាកាស​​ជុំវិញ​ដែល​គេ​កំពុង​រស់​នៅ។ ហេតុ​ដូចនេះ​ហើយ​ទើប​កុមារ​ខ្លះ​ដែល​មក​ពីគ្រួសារ​ល្អ​ច្រើន​តែ​មាន​អាកប្បកិរិយា​ល្អ។ ពួកគេ​ទទួល​បាន​ការ​មើល​ថែ​យ៉ាង​ល្អ​ឥតខ្ចោះ​ដែល​ភាព​ល្អ​នេះ​មាន​ឥទ្ធិពល​លើ​ភាព​ជឿជាក់​ និង​អាកប្បកិរិយា​របស់​ពួកគេ​ទាំង​ក្នុង​ការ​សិក្សា និង​អាជីព​នា​ពេល​អនាគត។

ជាង​នេះ​ទៀត កុមារ​ដែល​បាន​ទទួល​ឱកាស​ក្នុង​ការ​រៀន​សូត្រ​ដោយ​ខ្លួន​ឯង និង​ទទួល​វិន័យ​អប់រំ​យ៉ាង​ល្អ​មាន​ទំនាក់​ទំនង​ក្នុង​សង្គម​ល្អ​ជាង​កុមារ​ដែល​មិន​មាន​ការ​រៀន​សូត្រ ឬ​ទទួល​ការ​អប់រំ​វិន័យ។

តើ​អ្នក​ដឹង​ទេ​ថា “ការ​និយាយ​បែប​កូន​ក្មេង” គឺ​ជា​ឧបករណ៍​ធ្វើ​ទំនាក់​ទំនង​យ៉ាង​មាន​ប្រសិទ្ធភាព​ទៅ​កាន់​កូនៗ​?
តើ​អ្នក​ធ្លាប់​បាន​សង្កេត​មើល​ដែរ​ទេ​ថា​ឪពុក​ម្ដាយ ជា​ពិសេស​ម្ដាយ មាន​ទេពកោសល្យ​ពី​កំណើត​ក្នុង​ការ​និយាយ​ដូច​ជា​ក្មេង​ពេល​ដែល​និយាយ​ជាមួយ​កូន​របស់​ពួក​គេ? នេះ គឺ​ជា​ភាសា​ម្យ៉ាង​ដែល​គេ​ហៅ​ថា​ ការ​និយាយ​បែប​កូន​ក្មេង ដើម្បី​ប្រាស្រ័យ​ទាក់ទង​ជាមួយ​នឹង​កូន​តូច។

មូលហេតុ​ដែល​ឪពុក​ម្ដាយ​ភាគ​ច្រើន​ចូលចិត្ត​ប្រើ​ភាសា​នេះ គឺ​ព្រោះ​តែ​ភាព​រណ្ដំ​នៃ​សំឡេង​របស់​ពួក​គេ។ ទារក​អាច​ចាប់​បាន​ពាក្យ​ទាំង​នោះ ហើយ​វា​អាច​ជួយ​ពួកគេ​ក្នុង​ការ​ស្វែង​យល់​ពាក្យ ព្រោះ​ថា​ពាក្យ​នីមួយៗ​ត្រូវ​បាន​និយាយ​យ៉ាង​ច្បាស់ និង​ងាយ​យល់។

តើ​អ្នក​មាន​ដឹង​ទេ​ថា​ការ​មើល​កម្មវិធី​ទូរទស្សន៍​របស់​កុមារ​មិនមែន​សុទ្ធ​តែ​មាន​ប្រយោជន៍?
ផ្ទុយ​ស្រឡះ​ពី​ជំនឿ​ទូទៅ ការ​អនុញ្ញាត​ឱ្យ​កូន​របស់​អ្នក​មើល​កម្មវិធី​ទូរទស្សន៍ មិន​អាច​ជួយ​ពួក​គេ​ឱ្យ​រៀន​បាន​ឆាប់​រហ័ស​ឡើយ។ កម្មវិធី​ទាំង​នេះ​ប្រហែល​ជា​មិន​មែន​ជា​កម្មវិធី​អប់រំ ប៉ុន្តែ វា​អាច​គ្រាន់​តែ​ជា​កម្មវិធី​កម្សាន្ត​សម្រាប់​ក្មេង​តូច​តែ​ប៉ុណ្ណោះ ជា​ពិសេស​កម្មវិធី​ដែល​មាន​ពណ៌ និង​ចម្រៀង​នោះ។ ចិត្ត​វិទូ​ជា​ច្រើន​នៅ​តែ​ចង់​ឱ្យ​មាតា​បិតា​ចំណាយ​ពេល​ជាមួយ​កូនៗ​ឱ្យ​បាន​ច្រើន។

កូន​របស់​អ្នក​ គឺ​ជា​វត្ថុ​តូច​ដ៏​អស្ចារ្យ​មួយ។ ពួក​គេ​អាច​ធ្វើ​កិច្ចការ​ច្រើន​ដែល​យើង​មិន​ដឹង។ ក្នុង​នាម​ជា​ឪពុក​ម្ដាយ យើង​ត្រូវ​មើល​ថែ​ពួក​គេ និង​ប្រាកដ​ថា​អ្វី​ដែល​ពួក​គេ​រៀន និង​មើល​ឃើញ​ គឺ​ពិត​ជា​សម​ស្រប​នឹង​អាយុ​របស់​ពួក​គេ៕

អត្ថបទដើម៖ 4 Fascinating Facts About Your Child

អត្ថប្រយោជន៍នៃតន្រ្តីសម្រាប់កុមារវ័យតូចៗ

on Thursday, 11 January 2018. Posted in Classes, Parenting Tips, Activities

Ly Lang and drum

ទស្សនវិទូ ប្លាតូ បាននិយាយថា “តន្ត្រីគឺជាច្បាប់នៃសីលធម៌។ វាផ្ដល់នូវព្រលឹងដល់ភពផែនដី ស្លាបដល់ចិត្ត ការហោះហើរដល់ការស្រមើមៃ និងមន្ដស្នេហ៍ និងភាពរីករាយដល់ជីវិត និងអ្វីៗគ្រប់យ៉ាង។” ការផ្ដល់ឱកាសដល់កូនៗក្នុងការរៀនលេងឧបករណ៍តន្រ្តី ឬរៀនចម្រៀង អាចផ្ដល់នូវអត្ថប្រយោជន៍ដល់ពួកគេយ៉ាងច្រើន។

  • ការអភិវឌ្ឍខួរក្បាល
    តន្រ្តីមិនត្រឹមតែធ្វើឱ្យយើងរីករាយប៉ុណ្ណោះទេ តែវាថែមទាំងជួយអភិវឌ្ឍខួរក្បាលទៀតផង។ ចាប់ផ្ដើមចាក់ចម្រៀងឱ្យកូនស្ដាប់ពេលដែលពួកគេនៅតូចៗអាចបង្កើនភាពវៃឆ្លាតរបស់ពួកគេ។ ការសិក្សាបានបង្ហាញថា កុមារដែលលេងឧបករណ៍តន្រ្តីច្រើនតែរៀនពូកែជាងអ្នកដែលមិនលេងឧបករណ៍តន្រ្តីសោះ។ ការលេងឧបករណ៍តន្រ្តីជួយឱ្យខួរក្បាលបង្កើតនូវជំហានថ្មីៗ។ តន្រ្តី និងចម្រៀងក៏អាចជួយកូនៗរបស់លោកអ្នកមានការចងចាំល្អ។ តន្រ្តីមិនត្រឹមតែជួយពួកគេក្នុងពេលបច្ចុប្បន្ននោះទេ តែក៏អាចជួយពួកគេពេលដែលពួកគេរីកលូតលាស់ពេញវ័យផងដែរ។
  • វិន័យ និងទំនួលខុសត្រូវ
    ការលេងឧបករណ៍តន្រ្តី និងការរៀនច្រៀងអាចបង្រៀនកូនរបស់អ្នកពីវិន័យ និងទំនួលខុសត្រូវ ដែលនេះគឺជាចរិតលក្ខណៈដែលពួកគេនឹងត្រូវការពេលដែលពួកគេពេញវ័យ។ កូនរបស់អ្នកនឹងរៀនពីវិធីចំណាយពេលវេលាឱ្យឆ្លាតវៃពេលដែលពួកគេអនុវត្ត និងរៀនថាតើត្រូវចំណាយការខំប្រឹងប៉ុន្មាន បើខំប្រឹងកាន់តែច្រើន កាន់តែល្អ។ កូនៗរបស់អ្នកមិនត្រឹមតែរៀនពីការគោរពវិន័យ និងការទទួលខុសត្រូវប៉ុណ្ណោះទេ តែពួកគេក៏អាចរៀនពីការស្ដាប់យ៉ាងប្រុងប្រយ័ត្ន និងផ្ចង់ស្មារតីលើអ្វីដែលពួកគេកំពុងធ្វើទៀតផង។
  • ភាពអំណត់
    គុណប្រយោជន៍មួយទៀតដែលតន្រ្តីមានឥទ្ធិពលលើកុមារនោះគឺ វាបង្រៀនពួកគេឱ្យមានភាពអត់ធ្មត់ខ្ពស់។ ការរៀនច្រើនតាមបច្ចេកទេសត្រឹមត្រូវ ឬរៀនលេងឧបករណ៍តន្រ្តីណាមួយចាំបាច់ត្រូវចំណាយពេលរៀន។ ភាពល្អឥតខ្ចោះមិនមែនកើតឡើងត្រឹមតែមួយថ្ងៃនោះទេ។ កូនៗរបស់អ្នកនឹងរៀនពីការខំធ្វើការងារ និងអត់ធ្មត់ពេលដែលពួកគេរៀនអ្វីថ្មី។
  • កាត់បន្ថយភាពតានតឹង និងបង្ហាញពីខ្លួនឯង
    មនុស្សយើងកាន់តែចាស់ កាន់តែមានភាពតានតឹង។ ពួកគេត្រូវបែងចែកគ្នាឱ្យដាច់រវាងកន្លែងធ្វើការ សាលារៀន និងការរីករាយក្នុងសង្គម ហើយវាពិតជាពិបាកក្នុងការស្វែងរកសេចក្ដីសុខ​ឱ្យខ្លួនឯង។ ការចាក់តន្រ្តីស្ដាប់ ឬច្រៀងអាចជួយកូនៗរបស់អ្នកក្នុងការកាត់បន្ថយភាពតានតឹងពេលដែលពួកគេធំឡើង។ តន្រ្តីអាចជួយមនុស្សឱ្យគ្រប់គ្រងអារម្មណ៍ពេលដែលពួកគេមានអារម្មណ៍ពិបាកចិត្ត។ កូនៗរបស់អ្នកអាចប្រើសំឡេង ឬសមត្ថភាពរបស់ពួកគេដើម្បីបង្ហាញពីអារម្មណ៍ដែលពិបាកចិត្ត។ ដូចដែលតន្រ្តីអាចជួយមនុស្សឱ្យឆ្លងកាត់ពេលវេលាមិនល្អ តន្រ្តីក៏ជួយឱ្យពួកគេបង្ហាញភាពវិជ្ជមានរបស់ខ្លួនឯងផងដែរ។
  • ជំនាញសង្គម
    តន្រ្តីគឺជាសិល្បៈមួយដែលពិតជាអាចឱ្យមនុស្សអាចរាប់អានគ្នា។ វាគឺជាភាសាមួយដែលមនុស្សអាចយល់។ ការផ្ដល់ឱកាសឱ្យកូនៗច្រៀងចម្រៀង ឬលេងឧបករណ៍តន្រ្តីអាចជួយពួកគេរាប់អានមិត្តភក្ដិ និងបង្រៀនពួកគេពីវិធីក្នុងការទាក់ទងជាមួយអ្នកដទៃ។ ការចូលក្នុងក្រុមដែលចូលចិត្តតន្រ្តីអាចបង្រៀនកូនៗរបស់អ្នកឱ្យចេះធ្វើការជាមួយកុមារដែលមានវ័យប្រហាក់ប្រហែលនឹងពួកគេ។

សូមផ្ដល់ឱកាសដល់កូនៗឱ្យទទួលយកនូវអត្ថប្រយោជន៍ពីការច្រៀង និងលេងឧបករណ៍តន្រ្តី។ ផ្ដល់ឱកាសឱ្យពួកគេក្នុងការរៀនអ្វីដែលថ្មីនៅថ្ងៃនេះ។ លោកអ្នកអាចចុះឈ្មោះពួកគេឱ្យរៀនជាមួយនឹងគ្រូភ្លេង ឬគ្រូបង្រៀនច្រៀង៕

អត្ថបទដើម៖ Benefits of Music at a Young Age

កិច្ចការប្រចាំថ្ងៃដែលកុមារអាចធ្វើបានតាមវ័យរបស់ពួកគេ

on Wednesday, 10 January 2018. Posted in Parenting Tips, Activities

Family Chores

តើអ្នកកំពុងត្រៀមឱ្យកូនៗរបស់អ្នកក្លាយជាមនុស្សដែលឯករាជ្យមែនទេ? ការបង្រៀនកូនៗពីបំណិនជីវិតមិនត្រឹមតែមានសារសំខាន់សម្រាប់ការថែរក្សាខ្លួនឯងប៉ុណ្ណោះទេ តែថែមទាំងអនុញ្ញាតឱ្យគេមានអារម្មណ៍ថាពួកគេមានសិទ្ធិ និងអំណាចគ្រប់គ្រាន់ទៅលើការការធ្វើកិច្ចការក្នុងសង្គម និងបញ្ជាក់ហេតុផលនានា និងអាចជួយឱ្យពួកគេមានការអភិវឌ្ឍការឱ្យតម្លៃលើខ្លួនឯងយ៉ាងល្អ។ ខាងក្រោមនេះគឺជាបញ្ជីចន្លោះវ័យដែលអាចធ្វើបានក្នុងកិច្ចការប្រចាំថ្ងៃរបស់ពួកគេ។

អាយុចាប់ពី ២ ទៅ ៣ ឆ្នាំ៖ ការងារស្រាលៗ

អាយុចន្លោះនេះគឺជាពេលដែលកូនរបស់អ្នកចាប់ផ្ដើមរៀនពីជំនាញជាមូលដ្ឋាន។ កុមារដែលឈានចូលដល់អាយុ ៣ ឆ្នាំ គួរតែអាច៖

  • រៀបចំទុកដាក់ប្រដាប់លេងដោយខ្លួនឯងបន្ទាប់ពីលេងរួច
  • ស្លៀកពាក់ដោយខ្លួនឯង (ដោយមានការជួយពីអ្នក)
  • ទុកសម្លៀកបំពាក់ដែលស្លៀកពាក់រួចទៅក្នុងកន្ត្រក
  • បន្ទាប់ពីទទួលទានអាហាររួច ត្រូវយកចានទៅទុកកន្លែងលាងចានដោយខ្លួនឯង
  • ជួយរៀបចំតុ
  • ចេះដុសធ្មេញ និងលុបមុខដោយមានជំនួយខ្លះពីអ្នក

អាយុចាប់ពី ៤ ទៅ ៥ ឆ្នាំ៖ ស្គាល់ឈ្មោះ និងលេខ

នៅពេលដែលកូនរបស់អ្នកឈានចូលដល់អាយុនេះ ជំនាញសុវត្ថិភាពពិតជាសំខាន់សម្រាប់ពួកគេ។ ពួកគេគួរតែដឹង៖

  • ឈ្មោះពេញ អាសយដ្ឋាន និងលេខទូរស័ព្ទរបស់ខ្លួនឯង និងអ្នកផ្ទះ
  • ចេះហៅទូរស័ព្ទពេលមានគ្រោះអាសន្នណាមួយកើតឡើង

ពួកគេក៏គួរតែរៀនពី៖

  • ការចេះសម្អាតកិច្ចការស្រាលៗដូចជាសម្អាតធូលីដីនៅកន្លែងដែលពួកគេអាចឈោងដល់ និងរៀបចំតុបន្ទាប់ពីញ៉ាំអាហាររួច
  • ដាក់ចំណីឱ្យសត្វចិញ្ចឹម (បើមាន)
  • កំណត់អត្តសញ្ញាណរបស់លុយ និងយល់ពីរបៀបនៃការប្រើលុយ
  • ដុសធ្មេញ សិតសក់ និងលាងមុខដោយមិនមានជំនួយ
  • ជួយក្នុងកិច្ចការបោកគក់ដូចជារៀបចំសម្លៀកបំពាក់ទុកឱ្យស្រួល និងយកខោអាវដែលប្រឡាក់ ឬស្លៀកពាក់ហើយទៅទុកកន្លែងបោកគក់
  • ជ្រើសរើសខោអាវស្លៀកពាក់ដោយខ្លួនឯង

អាយុចាប់ពី ៦ ទៅ ៧ ឆ្នាំ៖ ស្គាល់ពីរបៀបចម្អិនអាហារងាយៗ

កុមារក្នុងវ័យនេះអាចចាប់ផ្ដើមជួយអ្នកក្នុងការចម្អិនអាហារ និងអាចរៀនពី៖

  • លាយ កូរ និងកាត់ជាមួយកាំបិតដែលមិនធ្វើឱ្យមុតដៃក្មេង។
  • ចម្អិនអាហារងាយៗដូចជាការធ្វើនំប៉័ងសាំងវិចជាដើម។
  • ជួយរៀបចំគ្រឿងទេសដែលប្រើរួចដាក់ចូលក្នុងទូវិញ។
  • លាងចាន

កូនអ្នកក៏គួរតែរៀនពី៖

  • ការប្រើសម្ភារសម្អាតងាយប្រកបដោយសុវត្ថិភាព
  • សម្អាតបន្ទប់ទឹកបន្ទាប់ពីប្រើរួច
  • រៀបចំគ្រែគេងដោយមិនមានជំនួយពីអ្នក
  • ងូតទឹកដោយខ្លួនឯង

អាយុចាប់ពី ៨ ទៅ ៩ ឆ្នាំ៖ ចំពោះសម្ភារផ្ទាល់ខ្លួន

ក្នុងវ័យនេះ កូនរបស់អ្នកគួរតែស្គាល់ពីកាតព្វកិច្ចក្នុងការថែរក្សាសម្ភារផ្ទាល់ខ្លួន។ កិច្ចការទាំងនេះរួមមាន៖

  • បត់សម្លៀកបំពាក់ដោយខ្លួនឯង
  • រៀនដេរ
  • មើលថែរបស់លេង ឬរបស់ប្រើដែលទុកនៅក្រៅផ្ទះមានដូចជាកង់ ឬស្គីជាដើម

ពួកគេក៏គួរតែរៀនពី៖

  • ការថែរក្សាអនាម័យផ្ទាល់ខ្លួនដោយមិនចាំបាច់មានអ្នកណាប្រាប់
  • ប្រើអំបោស និងប្រដាប់ចូកសម្រាមឱ្យបានត្រឹមត្រូវ
  • អានក្បួនធ្វើម្ហូប និងចម្អិនអាហារងាយៗ
  • ជួយបង្កើតបញ្ជីមុខម្ហូប និងគ្រឿងផ្សំដែលត្រូវទិញ
  • កត់ត្រានូវសារដែលមាននៅក្នុងទូរស័ព្ទ ឬបានទទួលទូរស័ព្ទ
  • ជួយស្រោចទឹក និងមើលថែរក្សាផ្កា និងរុក្ខជាតិ
  • យកសម្រាមទៅទុកនៅក្រៅផ្ទះ

អាយុចាប់ពី ១០ ទៅ ១៣ ឆ្នាំ៖ ការបង្កើនភាពឯករាជ្យផ្ទាល់ខ្លួន

អាយុ ១០ ឆ្នាំ គឺជាវ័យដែលកូនរបស់អ្នកអាចចាប់ផ្ដើមបង្ហាញនូវជំនាញដែលបង្ហាញពីភាពឯករាជ្យហើយ។ ពួកគេគួរតែដឹងពី៖

  • ការនៅផ្ទះម្នាក់ឯង
  • ទៅហាងទំនិញ និងទិញទំនិញដោយខ្លួនឯង
  • ប្ដូរកម្រាលពូកដោយខ្លួនឯង
  • ប្រើម៉ាស៊ីនបោកខោអាវ និងសម្ងួតខោអាវ
  • គ្រោង និងរៀបចំអាហារដោយប្រើគ្រឿងផ្សំច្រើន
  • ប្រើម៉ាស៊ីនឡ (ម៉ាស៊ីនដុតនំ)ដើម្បីអាំង ឬដុតអាហារ

កូនរបស់អ្នកក៏គួរតែរៀនពី៖

  • ការអានស្លាកសញ្ញា
  • អ៊ុតសម្លៀកបំពាក់ដោយខ្លួនឯង
  • រៀនពីការប្រើសម្ភារជួសជុលងាយៗ
  • ជម្រះស្មៅ
  • មើលថែប្អូន ឬអ្នកជិតខាង

អាយុចាប់ពី ១៤ ទៅ ១៨ ឆ្នាំ៖ ត្រូវតែរៀនពីជំនាញដែលត្រូវប្រើប្រចាំថ្ងៃខ្លាំងជាងមុន

នៅមុនវ័យ ១៤ ឆ្នាំ កូនរបស់អ្នកគួរតែមានភាពស្ទាត់ជំនាញក្នុងកិច្ចការស្រាលៗពីមុនមកហើយ។ បន្ថែមពីនេះទៀត កូនរបស់អ្នកក៏គួរតែអាច៖

  • ចេះសម្អាតកន្លែងដែលស្មុគស្មាញជាងមុន និងជួសជុល ដូចជាការផ្លាស់ប្ដូរប្រអប់របស់ម៉ាស៊ីនបូមធូលី សម្អាតចង្ក្រាន និងជួសជុលបំពង់ទឹក
  • អាន និងយល់ពីឈ្មោះថ្នាំដែលបង្ហាញ និងបរិមាណប្រើ
  • ទៅសម្ភាសរកការងារធ្វើ
  • រៀបចំ និងចម្អិនអាហារបើចាំបាច់

មនុស្សពេញវ័យ៖ រៀបចំក្នុងការរស់នៅដោយខ្លួនឯង

កូនរបស់អ្នកនឹងត្រូវតែដឹងពីការចិញ្ចឹមខ្លួនឯងពេលដែលពួកគេត្រូវទៅរៀននៅសាកលវិទ្យាល័យ ឬរើផ្ទះទៅនៅខាងក្រៅ។ ក្នុងនោះក៏មានកិច្ចការមួយចំនួនដែលពួកគេត្រូវដឹងមុននឹងរើចេញទៅក្រៅ ដែលកិច្ចការទាំងនេះមានដូចជា៖

  • ការណាត់ជួបពិគ្រោះជាមួយគ្រូពេទ្យ និងពេទ្យធ្មរញ និងការណាត់ជួបផ្សេងទៀតដែលមានសារសំខាន់ដល់សុខភាព
  • មានការយល់ដឹងខ្លះៗពីហិរញ្ញវត្ថុ និងអាចគ្រប់គ្រងគណនីដាក់ប្រាក់នៅធនាគារ បង់លុយ និងប្រើបណ្ណឥណទានបានដោយខ្លួនឯង
  • យល់ពីកិច្ចសន្យានានាដូចជាការជួលផ្ទះ ឬបង់រំលស់រថយន្តជាដើម៕

អត្ថបទដើម៖ I did it all by myself! An age-by-age guide to teaching your child life skills

១០ ចំណុចក្នុងការបណ្ដុះមហិច្ចតាដល់កូនៗ

on Tuesday, 09 January 2018. Posted in Parenting Tips, Activities

21 ways to encourage your child to dream big

សូម​អាន​ចំណុច​ទាំង ១០ ខាង​ក្រោម​ដើម្បី​លើក​ទឹក​ចិត្ត​កូនៗ​របស់អ្នក​ឱ្យ​មាន​ការ​អភិវឌ្ឍ​ផ្នែក​គំនិត​ច្នៃប្រឌិដ្ឋ ការ​ស្រមើ​ស្រមៃ និង​ការ​អភិវឌ្ឍ​ផ្នែក​អារម្មណ៍។

  1. ជំរុញ​ទឹក​ចិត្ត​ពួក​គេ៖ មនុស្ស​ម្នាក់​នឹង​ក្លាយ​ជា​អ្នក​ដឹក​នាំ។ ប្រសិន​បើ​កូន​របស់​អ្នក​ចង់​ធ្វើអ្វី​មួយ​ឱ្យ​មាន​កិត្តិនាម កុំ​បោះចោល​គំនិត​របស់​ពួកគេ​ឱ្យ​សោះ។ អ្នក​ត្រូវ​ជំរុញ​ទឹក​ចិត្ត​របស់​ពួកគេ​ឱ្យ​ធ្វើ​យ៉ាងណា​ឱ្យ​សុបិន​នោះ​ក្លាយ​ជា​ការ​ពិត។
  2. ប្រកួត​ប្រជែង​ជាមួយ​ពួក​គេ៖ ការ​ឃាត់​ទុក ឬ​ការពារ​ពួកគេ​គ្រប់​បែប​យ៉ាង​នោះ​កាន់​តែ​ធ្វើ​ឱ្យ​ពិភព​លោក​ជុំវិញ​គេ​គ្រោះថ្នាក់​ជាង​ការ​ពិត​ទៅ​ទៀត។ ចូរ​ឱ្យ​ពួកគេ​ចាប់​ផ្ដើម​ហាត់​ពត់​លត់​ដំ​ខ្លួន​ក្នុង​ការ​ប្រកួត​ប្រជែង​នានា រួច​ហើយ​អបអរ​សាទរ​ពួកគេ​ពេល​ដែល​ពួកគេ​ទទួល​ជោគជ័យ។
  3. មើល​ឃើញ​ច្បាស់​ពី​ពិភព​លោក៖ ផ្ដល់​ឱកាស​ឱ្យ​កូនៗ​ក្នុង​ការ​មើល និង​ស្វែង​យល់​ពីរបស់​ថ្មីៗ ទីកន្លែង​ថ្មីៗ និង​ជួប​មនុស្ស​ថ្មីៗ។ គ្មាន​អ្នកណា​ម្នាក់​អាច​ផ្លាស់​ប្ដូរ​ពិភពលោក​បាន​ដោយ​គ្រាន់​តែ​សំងំ​ស្ងៀម​នៅ​ផ្ទះ​នោះ​ឡើយ។ ការ​នាំ​ពួក​គេ​ចេញ​ដើរ​កម្សាន្ត​ជា​វិធី​ដ៏​ល្អ​មួយ។
  4. ទិញ​សៀវភៅ៖ ការ​អាន​ជួយ​បើក​ចិត្ត និង​ជំរុញ​ឱ្យ​មាន​មហិច្ចតា ដូច្នេះ សូម​ទិញ​សៀវភៅ​មាន​ប្រយោជន៍​ឱ្យ​កូន​អាន​ឱ្យ​បាន​ញឹក​ញាប់។
  5. ជំរុញ​កូនៗ​ឱ្យ​ក្លាយ​ជា​វីរបុរស​/វីរនារី៖ មិនមាន​អ្វី​ខុស​ឆ្គង​នោះ​ទេ​បើ​គ្រាន់​តែ​ក្លាយ​ជា​អ្នក​ជួយ​សង្គ្រោះ​អ្នក​ដទៃ ផ្ទុយ​ទៅ​វិញ​វា​គឺ​ជា​វិធី​ដ៏​អស្ចារ្យ​មួយ​ក្នុង​ការ​ផ្ដោត​សំខាន់​ទៅ​លើ​មហិច្ចតា។ លើក​ទឹក​ចិត្ត​កូនៗ​ឱ្យ​ស្វែង​យល់​ពី​អ្វី​ដែល​វីរបុរស/វីរនារី​ធ្វើ ហើយ​ចាប់​ផ្ដើម​ដោយ​អ្វី​ខ្លះ។
  6. ការ​សម្ដែង​រឿង​ខ្លី៖ ការ​សម្ដែង​រឿង​ខ្លី​អាច​អភិវឌ្ឍ​ការ​គិត​បែប​ច្នៃ​ប្រឌិដ្ឋ​របស់​កុមារ។ កុមារ​អាច​ធ្វើ​វា​បាន​ដោយ​មិន​បាន​ត្រៀម​ទុក ប៉ុន្តែ ការ​លើក​ទឹក​ចិត្ត​ពួក​គេ និង​ផ្ដល់​នូវ​សាច់​រឿង ឬ​ឃ្លា​ឃ្លោង​សម្រាប់​និយាយ នោះ​នឹង​កាន់​តែ​ប្រសើរ។
  7. ការ​លេង​ជា​ក្រុម៖ កុមារ​នឹង​លូតលាស់​ប្រកប​ដោយ​ភាព​ជឿជាក់​លើ​ខ្លួន​ឯង​ប្រសិន​បើ​ពួកគេ​លេង​ជាមួយ​កុមារ​ដទៃ​ទៀត​ជា​ប្រចាំ។ ពួកគេ​ក៏​អាច​រៀន​ពី​របៀប​ផ្ដល់​ឥទ្ធិពល​ដល់​អ្នក​ដទៃ។
  8. ទទួល​យក​ការ​ផ្លាស់​ប្ដូរ៖ ប្រសិនបើ​ពួកគេ​និយាយ​ប្រាប់​អ្នក​ពី​គម្រោង​ដែល​ពួក​គេ​នឹង​ធ្វើ​ខុស​ពី​ថ្ងៃមុន សូម​កុំ​ចង​ចិញ្ចើម ហើយ​ខឹង​ពួកគេ​ឱ្យ​សោះ ព្រោះ​ពួក​គេ​ប្រហែល​ជា​បាន​គិត និង​ស្វែង​យល់​ថា​ពួក​គេ​អាច​ធ្វើអ្វី​ផ្សេង​ខុស​ពី​អ្វី​ដែល​ពួក​គេ​បាន​ប្រាប់​អ្នក​ថ្ងៃ​មុន ឧទាហរណ៍ ថ្ងៃ​មុន ពួក​គេ​ចង់​ធ្វើ​ជា​គ្រូ​ពេទ្យ ហើយ​ថ្ងៃ​នេះ​ពួក​គេ​ប្រាប់​អ្នក​ថា​ពួក​គេ​ចង់​ធ្វើ​ជា​គ្រូ​បង្រៀន​វិញ​នោះ​ជា​ដើម។
  9. គ្រប់យ៉ាង​មិនមែន​សុទ្ធ​តែ​ផ្ដោត​សំខាន់​លើ​លុយ​ប៉ុណ្ណោះ​ទេ៖ កុំ​បង្ខំ​កូន​របស់​អ្នក​ឱ្យ​ចាប់​យក​តែ​ការងារ ឬ​មុខ​របរ​ណា​ដែល​អាច​រក​លុយ​បាន​ច្រើន។ ជីវិត​រីករាយ​សំខាន់​ជាង​លុយ​ទៅ​ទៀត។
  1. គ្រប់​យ៉ាង​សុទ្ធ​តែ​អាច​ទៅ​រួច​ទាំង​អស់៖ គ្រប់​មនុស្ស​ទាំង​អស់​សុទ្ធ​តែ​មាន​ភាព​ជា​ខ្លួន​ឯង ហើយ​ថ្ងៃនេះ​ពិភពលោក​កាន់​តែ​មាន​សមភាព​ជាង​ពេល​មុនៗ។ ស្ទើរ​តែ​គ្រប់​យ៉ាង​សុទ្ធ​តែ​អាច​ធ្វើ​បាន​ប្រសិន​បើ​អ្នក​ចង់​ធ្វើ​វា​មែន​ទែន។ សូម​កុំ​បោះបង់​មហិច្ចតា​ឱ្យ​សោះ៕

អត្ថបទដើម៖ 10 ways to nurture ambition in children

ហេតុអ្វីបានជាត្រូវជំរុញកូនៗក្នុងការស្ដាប់?

on Friday, 08 December 2017. Posted in Parenting Tips

អ្នក​ប្រហែល​ជា​គិតថា​ការ​ស្ដាប់ គឺជា​ការ​ឆ្លើយតប​ដោយ​ស្វ័យ​ប្រវត្តិ ហើយ​វា​ជា​ការ​ពិត​ដែល​ថា​វា​អាច​នឹង​ពិបាក​ក្នុង​ការ​លុប​បំបាត់​សំឡេង​របស់​បរិយាកាស​ជុំវិញ​អ្នក ប៉ុន្តែ ការស្ដាប់ដែល​មាន​ប្រសិទ្ធភាព គឺ​ជា​ដំណើរការ​នៃ​សំឡេង និង​ការ​ឆ្លើយ​តប​យ៉ាង​ត្រឹម​ត្រូវ​ទៅ​លើ​អ្វី​ដែល​គេ​បាន​និយាយ។ ការ​ស្ដាប់​ដែល​មាន​ប្រសិទ្ធភាព គឺ​ជា​ជំនាញ​សំខាន់​មួយ​សម្រាប់​ការ​សិក្សា និង​ផ្នែក​នានា​ដែល​អាច​ជួយ​កូន​អ្នក​ក្នុង​ការ​អភិវឌ្ឍ។

talking to kids 467x267

អត្ថប្រយោជន៍

ប្រសិន​បើ​កូន​ស្រី​របស់​អ្នក​រៀន​ស្ដាប់​បាន​ច្បាស់ នាង​នឹង​អាច​មាន​ជំនាញ​ល្អ​ក្នុង​ការ​ប្រមូល​ផ្ដុំ វិភាគ ផ្ទុក​ និង​ចែក​រំលែក​ព័ត៌មាន។ នាង​នឹង​កាន់​តែ​មាន​សមត្ថភាព​ប្រើ​ព័ត៌មាន​នោះ​ដើម្បី​បង្កើត​ជា​ជំហាន​ដែល​សំខាន់​ក្នុង​ការ​ប្រើ​ដើម្បី​យល់​ពី​អ្វី​ដែល​កំពុង​បង្រៀន​នៅ​សាលារៀន។ ជំនាញ​ភាសា និង​ទំនាក់​ទំនង​របស់​នាង​កាន់​តែ​ខ្លាំង​សម្រាប់​ជា​ជំនួយ​ក្នុង​ការ​ស្វែង​រក​ភាព​ពិត ការ​បង្ហាញ​ពី​គំនិត និង​ការ​ចែក​រំលែក​គំនិត​ដែល​សុទ្ធ​តែ​មាន​ទំនាក់​ទំនង​ក្នុង​សកម្មភាព​សិក្សា​ដែល​អាច​ជួយ​នាង​ឱ្យ​អាច​បែង​ចែក​ចំណេះដឹង​ថ្មីៗ​កាន់​តែ​មាន​ប្រសិទ្ធភាព។ ចំណែកឯ​ទំនាក់​ទំនង​ផ្នែក​សង្គម​វិញ នាង​នឹង​អាច​បង្កើន​ទំនាក់​ទំនង​​ជាមួយ​អ្នក​ដទៃ​កាន់​តែ​រឹង​មាំ ដោយ​ការ​ស្ដាប់​អ្នក​ដទៃ នាង​នឹង​មាន​ភាព​ងាយ​ស្រួល​ក្នុង​ការ​រក​ភាព​ដូច​គ្នា ​អភិវឌ្ឍ​ក្ដី​អាណិត​អាសូរ គ្រប់គ្រងរាល់ជម្លោះនានា និងផ្ដល់ការគាំទ្រផ្សេងៗ។ នាងនឹងមានអារម្មណ៍ថាបានចូលរួមគ្រប់សកម្មភាពដែលអាចអភិវឌ្ឍភាពជឿជាក់លើខ្លួននាង និងការឱ្យតម្លៃខ្លួនឯងខ្ពស់។ នាងនឹងមានភាពរីករាយច្រើនពីការចូលរួមសកម្មភាពសង្គម និងមានអារម្មណ៍ថាអាចមានទំនាក់ទំនងកាន់តែច្រើន។

អ្វីដែលអ្នកអាចជួយបាន

ការលេងហ្គេមដែលពាក់ព័ន្ធនឹងសំឡេងអាចជួយកូនរបស់អ្នកឱ្យមានការផ្សារភ្ជាប់សំឡេងជាមួយនឹងអត្ថន័យ។ អ្នកអាចប្រើចម្រៀង និងហ្គេមកុមារដើម្បីជួយឱ្យគេរៀនបានដោយងាយៗដូចជាអាចរាប់លេខ រាប់អក្សរ និងឈានដល់ការដុសធ្មេញបានដោយខ្លួនឯងទៀតផង។ អ្នកអាចលើកទឹកចិត្តគេឱ្យស្ដាប់ឱ្យច្បាស់ពីសំឡេងដែលមាននៅជុំវិញដើម្បីឱ្យគេដឹងពីពិភពជុំវិញកាន់តែច្បាស់លើសពីការគ្រាន់តែមើលឃើញនឹងភ្នែកទទេ។ ការលេងហ្គេមពាក្យអាចជួយគេឱ្យគិតពីអ្វីដែលបានឮ ទាញយកព័ត៌មានចាំបាច់ និងត្រឹមត្រូវ និងប្រើវាដើម្បីបង្កើតជាការឆ្លើយតបដ៏ស័ក្តិសម។ វានឹងជួយឱ្យនាងមានការអភិវឌ្ឍទាំងខួរក្បាល និងការចងចាំរបស់នាង។ កុមាររៀនដោយការបង្ហាញពីមនុស្សធំនៅក្បែរខ្លួន និងដោយការបង្ហាញជំនាញស្ដាប់ល្អពីអ្នក នោះនាងនឹងទម្លាប់តាមអ្នក។ នេះរួមបញ្ចូលទាំងការផ្ចង់ស្មារតីពេលដែលនាងនិយាយជាមួយអ្នក ការរក្សាក្រសែភ្នែក ថាតាមពាក្យដែលនាងនិយាយដើម្បីបញ្ជាក់ឱ្យច្បាស់ថាអ្នកបានយល់ពីអ្វីដែលនាងនិយាយឬយ៉ាងណា ជំរុញនាងឱ្យបន្ថែមព័ត៌មាន ឬវិធីណាដែលអាចកែកំហុសនៃការប្រើពាក្យ ឬប្រយោគតាមកាល និងការសុំឱ្យនាងនិយាយឡើងវិញនូវអ្វីដែលនាងបាននិយាយប្រសិនបើអ្នកចាប់មិនបាននូវអ្វីដែលនាងបាននិយាយ។ ពេលដែលអ្នកកំពុងនិយាយជាមួយនាង វាពិតជាសំខាន់ក្នុងការចាំនូវអ្វីដែលនាងមិនអាចដោះស្រាយបញ្ហានានាដែលធ្លាប់បានទទួលការណែនាំរួចមកហើយនោះ។ អ្នកអាចចាប់ផ្ដើមដោយការពន្យល់ទិសដៅសាមញ្ញៗ បន្ទាប់មកទៀតបង្កើតឃ្លាពិបាកៗពេលដែលគេមានការរីកចម្រើនផ្នែកស្ដាប់ នោះនឹងបង្រៀនឱ្យគេយល់ពីរបៀបស្ដាប់ និងធ្វើតាមការណែនាំ។ ការនិយាយពីរឿងដែលអ្នកបានអាន ការសួរពីតួអង្គដែលនាងចូលចិត្ត ឬក៏ចំណុចរឿងដែលនាងចូលចិត្ត នឹងធ្វើឱ្យនាងចងចាំនូវអ្វីដែលនាងបានឮសម្រាប់ការប្រើនាពេលក្រោយ។  

វាអាចជារឿងមួយដ៏គួរឱ្យធុញប្រសិនបើកូនរបស់អ្នកមិនស្ដាប់អ្នក ហើយវាអាចកើតឡើងញឹកញាប់ពេលដែលនាងធ្វើរឿងដែលបិទការស្ដាប់ នោះនាងត្រូវដែលខំប្រឹងបង្កើនជំនាញស្ដាប់ខ្លាំងជាងមុនហើយ។ ប្រសិនបើអ្នកអាចដើរតួសំខាន់ក្នុងមុខងារនេះ នាងកាន់តែអាចរៀនស្ដាប់កាន់តែងាយស្រួល និងអាចប្រើវាដើម្បីរាប់អានមិត្តភក្ដិជាដើមទៀតផង៕

អត្ថបទដើម៖ Why You Should Encourage Listening Skills